Deputetja e Partisë Demokratike për qarkun e Vlorës, Ina Zhupa, ka zhvilluar disa takime me peshkatarët e qytetit të Sarandës, ku është njohur dhe me problematikat e tyre.
Problem madhor i peshkatarëve mbetet Porti i Peshkimit në Sarandë, i cili është në gjendje të mjerueshme. Sipas deputetes demokrate, kjo gjendje e mjerueshme është faj i institucioneve të papërgjegjshme.
Siç shihet nga pamjet në portin e peshkimit qëndrojnë anije të amortizuara dhe plehra të hedhura kudo.
“Porti i Peshkimit në Sarandë në gjendje të mjerueshme, papërgjegjshmëri institucionale. Situata e portit të peshkimit sot në Sarandë është dramatike. Pushteti kujtohet për peshkatarët vetëm kur vjen për votën, edhe kam 4 vjet që denoncoj për problematikat e peshkatarëve dhe s’ka asnjë përmirësim apo vëmendje.
Në portin e peshkimit shikon: Anije që kanë nga 10 vite në kantier duke zënë vendin e anijeve të tjera që kërkojnë rimont. Jahte private të cilat nuk kanë asnjë lidhje me peshkimin por që zënë vendin e varkave të peshkimit dhe nuk i lejojnë ato të riparohen në kohën e duhur. Anije turistike të ankoruara në mol që po me miq dhe dhunë kanë zënë vendin e varkave të peshkatarëve të thjeshtë.
Ujë i prerë dhe kabina elektrike të shkatërruara nga klientela të caktuara që duan ekskluzivitet të shërbimeve ndaj varkave. Grumbuj mbetjesh dhe papastërti të çdo lloji, që e bëjnë të duket se je në një landfill të madh riciklimi të mbetjeve sesa në një port peshkimi.
Janë të braktisur në çdo aspekt peshkatarët, ju kanë hequr çdo fond e subvencion pasi Krifcat me klientët zhdukën fondeve të IPARD, tashmë nuk ju krijojnë as kushtet minimale për një port dinjitoz peshkimi.
Anila Denaj dhe Oltion Caci kujtohen të vijnë për fushatë dhe të kërkojnë votën e peshkatarëve por nuk janë kujtuar këto vite ti ndërtojnë kushtet për të bërë punën e tyre të ndershme që mbajnë familjet. Nuk i gënjeni dot më!”, shkruan Zhupa.