Një video e shpërndarë nga faqja në Facebook “Vlora” ka ngjallur shqetësim në rrjetet sociale, pasi në pamjet e publikuara duket se po kryhet peshkim i paligjshëm me dinamit në ujërat e Vlorës. Ky veprim, i dënuar rreptësisht nga ligji, ka sjellë dëme të mëdha në ekosistemin detar, sipas denoncimit të faqes.
Në postimin e saj, “Vlora” ngre alarmin për ndikimin katastrofik që ky lloj peshkimi ka jo vetëm mbi popullatën e peshqve, por edhe mbi breshkat e detit, të cilat janë gjetur të ngordhura si pasojë e shpërthimeve në ujë. Denoncimi ka marrë edhe më shumë vëmendje pasi është shpërndarë nga faqja e njohur për çështjet mjedisore, Mjedisi.al.
Peshkimi me dinamit është një praktikë e ndaluar në Shqipëri dhe konsiderohet një nga format më shkatërruese të shfrytëzimit të burimeve ujore. Në Shqipëri, peshkimi me lëndë plasëse, përfshirë dinamitin, është rreptësisht i ndaluar dhe dënohet sipas ligjit nr. 64/2012 “Për Peshkimin”, i ndryshuar.
Sipas nenit 16 të këtij ligji, përdorimi i lëndëve plasëse, substancave kimike ose çdo mënyrë tjetër që vret, helmon apo paralizon peshqit dhe organizmat e tjerë ujorë është i ndaluar.
Përveç gjobave administrative, Kodi Penal i Republikës së Shqipërisë parashikon dënime me burg për veprimtari të tilla, duke i klasifikuar si “mbajtje pa leje dhe prodhim i armëve shpërthyese dhe i municionit”. Kjo nënkupton se individët e përfshirë në peshkim me dinamit mund të përballen me dënime deri në 7 vjet burg.
Autoritetet ende nuk kanë reaguar mbi këtë çështje, ndërsa qytetarët dhe aktivistët mjedisorë kërkojnë masa të menjëhershme për ndalimin e këtij fenomeni dhe ndëshkimin e përgjegjësve.