Eksodi i të rinjve, po së fundmi edhe i moshës së mesme dhe të tretë, po detyron bizneset në Vlorë që të kërkojnë punëtorët shumë larg. Tashmë në shumë bare, restorante, por edhe në njësi të tjera shërbimi mund të gjesh lehtësisht shtetas të huaj, nga vende shumë larg Shqipërisë që punojnë dhe jetojnë në Vlorë.
Sipas të dhënave nga Zyra e Emigracionit në qytetin bregdetar, përgjatë vitit 2024 ka pasur më shumë se 1600 kërkesa për leje qëndrimi dhe punësimi në Vlorë.
Bizneset shprehen se tashmë me nisjen e sezonit turistik do këtë sërish rritje të të kërkesave për punëtorë nga jashtë, pasi fuqia punëtore vendase sa vjen e po ulet për shkak të largimit të të rinjve.
Në zyrën e migracionit në Vlorë çdo ditë ka një numër të lartë kërkesash të shtetasve të huaj, të mbërritur kryesisht nga vendet e Afrikës dhe Azisë që zgjedhin Vlorën për të punuar.
Në këtë zyrë që ndodhet në portin detar të Vlorës mund të gjesh çdo ditë shtetas nga vende fqinje si Italia, Turqia etj, por edhe nga Australia e largët dhe nga vende të ndryshme të Afrikës dhe Azisë.
Sipas të dhënave nga drejtoria e kufirit dhe migracionit, 1400 shtetas të huaj janë rezidentë në Vlorë, por duke parë kërkesat e biznesit për fuqi punëtore, ky numër pritet që të rritet këtë vit pasi të dhënat tregojnë se mijëra të rinj janë larguar nga Vlora kohët e fundit.