Autoritetet shqiptare kanë hapur një tender publik me vlerë 82.9 milionë lekë për shërbimin e pastrimit të zonave bregdetare në bashkitë Vlorë, Himarë dhe Sarandë, një iniciativë që duket se synon përmirësimin e pastërtisë në vijën bregdetare përpara sezonit turistik.
Sipas dokumentit të tenderit, Operatori i Blerjeve të Përqendruara do të menaxhojë këtë proces, i cili do të zhvillohet me një procedurë të hapur dhe mbi kufirin e lartë monetar.
Ky tender është pjesë e një tenderi më të madh me një fond total prej 205,461,400.89 lekësh, i cili përfshin pastrimin e të gjitha bashkive bregdetare në Shqipëri. Projekti synon të sigurojë një mjedis më të pastër dhe të mirëmbajtur përgjatë gjithë vijës bregdetare, duke përfshirë qytetet më të rëndësishme turistike të vendit.
Sipas të dhënave të përfshira në tabelat mbi burimet njerëzore të nevojshme për pastrimin e zonave bregdetare, bashkitë me stafin më të madh të kërkuar për këto shërbime janë Durrësi dhe Vlora, secila me nga 137 punonjës të planifikuar për angazhim në pastrimin e plazheve dhe mbetjeve publike. Himara dhe Saranda, të cilat janë ndër destinacionet kryesore turistike në jug të vendit, kanë një staf të parashikuar prej 58 dhe 42 punonjësish përkatësisht.
Ndërkohë, në bazë të optimizimit të stafit për një orë mesatare pune prej 5.7 orësh në natë, rezulton se Durrësi dhe Vlora vijojnë të kenë nevojën më të madhe për fuqi punëtore, me 96 dhe 91 punonjës të optimizuar, ndërsa bashkitë si Divjaka dhe Rrogozhina kanë nevoja më të ulëta, me 9 dhe 16 punonjës përkatësisht.
Bashkitë e jugut të Shqipërisë, veçanërisht Himara dhe Saranda, njihen për ujërat e tyre të kristalta dhe cilësinë e mirë të plazheve, të cilat në krahasim me qytete si Durrësi apo Velipoja, përballen me më pak ndotje nga mbetjet e ngurta dhe ndotësit industrialë.
Gjurmon.al do të ndjekë nga afër këtë proces tenderimi, si dhe cilësinë dhe efektivitetin e pastrimit të plazheve në bashkitë e jugut të vendit, përfshirë Sarandën, Vlorën dhe Himarën.