Thirrjet e tyre për ndalim të punimeve të ujësjellësit nuk i dëgjoi askush, ndaj banorët e Tragjasit kanë dalë sërish në protestë këtë të shtunë.
Banorë nga Tragjasi dhe fshatrat rreth tij, por dhe të ardhur nga diaspora u mblodhën sërish në qendër të fshatit për kundërshtuar projektin që synon marrjen e ujit të lumit të Izvorit dhe dërgimin e tij në fshatrat e rivierës, Dhërmi, Palasë etj.
Ata u shprehën se burimet ujore të Izvorit nuk janë të mjaftueshme as për banorët e Tragjasit, Radhimës dhe Orikumit, e jo më për furnizimin e fshatrave dhe resorteve turistike të Himarës.
Kërkesa e tyre ishte e qartë, rishikimi i projektit, duke paralajmëruar se nëse nuk dëgjohet zëri i tyre protesta do të përshkallëzohet.
Kryeministri Edi Rama pak ditë më parë iu përgjigj një thirrje të tyre, duke u kërkuar që të ndalin protestën, pasi sipas tij projekti është në të mirën e të gjithëve, por banorët e Tragjasit kanë kërkuar takim me të për t’ia shprehur të gjitha problematikat.
Ndryshe nga protesta e fundit, ku policia ndërhyri dhunshëm për të shpërndarë protestuesit, këtë herë tubimi u zhvillua i qetë ku banorët kanë shprehur të gjitha pakënaqësitë e tyre.
Punimet për ndërtimin e ujësjellësit të ri kanë nisur në korrik 2024 dhe janë inspektuar asokohe nga ministrja Belinda Balluku e cila ka në varësi AKUK-un. Ujësjellësi i ri parashikohet të ketë depon në Tragjas dhe përmes tubacioneve do kalojë në tunelin e Llogarasë. Ky investim me vlerë 7 milionë euro bëhet për të furnizuar me ujë të pijshëm zonën e bregut, Palasë, Drimadhes, Dhërmi.