Banorët e fshatit Manastir, që ndodhet mbi plazhin Pasqyra, kanë dalë sot në protestë kundër një vendimi që parashikon prishjen e shtëpive të tyre për t’i hapur rrugë një investimi strategjik.
Sipas protestuesve, ky vendim prek mbi 150 familje, të cilat rrezikojnë të mbeten pa strehë. Banorët shprehen të shqetësuar për pasojat që ky projekt mund të ketë mbi komunitetin e tyre dhe akuzojnë autoritetet për mungesë transparence.
Banorët kërkojnë ndërhyrjen e institucioneve për të marrë certefikatat e pronësisë dhe për të gjetur një zgjidhje që nuk cënon të drejtat e tyre. Ata paralajmërojnë se do të vijojnë protestat deri në një përgjigje konkrete.
Nga ana tjetër, autoritetet ende nuk kanë dhënë një reagim zyrtar mbi pretendimet e banorëve dhe mbi mënyrën se si do të zbatohet ky projekt strategjik.
Deputetja e Partisë Demokratike, Ina Zhupa, ka reaguar ashpër ndaj vendimit për prishjen e shtëpive të banorëve në fshatin Manastir, mbi plazhin Pasqyra, duke e cilësuar këtë një tjetër akt grabitjeje në emër të “investimeve strategjike”.
Sipas saj, banorët rrezikojnë të humbasin shtëpitë e tyre për t’i hapur rrugë një projekti që favorizon një investitor të madh, duke i lënë familjet e tyre të pastreha.
“Hajdutëria dhe babëzia mbi pronat e lakmuara të vendit vazhdon në emër të investimeve strategjike. Edhe në muajt e fundit para përzënies me votë, kjo qeveri nuk i ndal vjedhjet strategjike,” – ka deklaruar Zhupa.
“Është vjedhje dhe skandal të marrësh pronat e qytetarëve, t’i rrafshosh, me qëllimin për t’ia dorëzuar një investitori strategjik,” – ka vijuar deputetja demokrate.
Zhupa ka deklaruar se do të vazhdojë të denoncojë këtë fenomen dhe do të mbështesë qytetarët në betejën për mbrojtjen e pronave të tyre, duke e cilësuar këtë si një pasojë të “ligjit për vjedhjet strategjike”.
Kujtojmë se Plazhi Pasqyrat në Ksamil është renditur si plazhi me ujin me të kaltër në botë. Sipas një studimi të kryer nga “CV Villas”, që analizoi më shumë se 200 imazhe satelitore të plazheve nga e gjithë bota, duke përdorur kodet digjitale të ngjyrave, ka rezultuar se plazhi i Pasqyrave në Sarandë ka ujin më me ngjyrën më të theksuar blu.