Me pankarta në duar dhe me thirrjet për pezullimin e projektit, banorët e Kuçit të mbështetur edhe nga aktivistë dhe politikanë të opozitës, protestuan edhe këtë të hënë kundër marrjes së ujit të lumit Shushica.
“Atë që na e fali perëndia, po na e merr babëzia”, “Larg duart nga Shushica”, “Nuk jemi banorë të Gazës”, ishin disa nga pankartat që mbanin në duart banorët e Kuçit, të cilët për të disatën herë protestuan kundër projektit të ujësjellësit të Himarës që synon marrjen e ujit të lumit Shushica.
Aktivistë të EcoAlbania ishin pjesë e kësaj proteste, ku në një postim në mediat sociale teksa shprehin mbështetje për banorët, pohojnë se do qëndrojnë krah tyre.
“Një tjetër fitore e banorëve të Shushicës. Dhjetëra banorë protestuan për të ndaluar punimet e ujësjellësit të Himarës. Të vendosur ata kërkuan largimin e makinerive nga lumi. Sot ia dolën, makineritë u larguan…A do të kthehen nesër? Banorët janë të vendosur të qëndrojnë të fortë. Nuk do të lejojnë makineritë të kthehen në lumë”, shkruhet në një postim në Facebook-un e EcoAlbania.
Në protestën e kësaj të hëne ishin të pranishëm edhe politikanë të opozitës, kandidatët për deputete të Nisma Shqipëria Bëhet.
Nënkryetarja e Lëvizjes “Shqipëria Bëhet”, mësuese Etleva Merko, u shpreh se e vetmja zgjidhje për këtë problematikë është referendumi si një mekanizëm ligjor për të dhënë fjalën e fundit qytetarëve.
“Kjo që shihni është një marrëzi, pushteti po u merr qytetarëve ujin e lumit, një burim jetik për ta. Nuk është e drejtë dhe prandaj ne e shohim të nevojshme një nga katër pikat e Lëvizjes Shqipëria Bëhet, që është referendum. E drejta të shkojë në fund tek qytetari. Kur çmendet qeveria, qytetari të vendosë me referendum për të drejtën e vetë,” u shpreh ajo.
