Me sezonin turistik të përfunduar, Bashkia Vlorë ka nxjerrë të dhëna zyrtare mbi administrimin dhe menaxhimin e plazheve publike dhe private, duke theksuar një rritje të ndjeshme të të ardhurave nga këto hapësira. Të dhënat të bëra publike pas një kërkese për informim të Gjurmon.al, zbulon se janë dhënë me qira 169,062 metra katrorë plazhe për përdorim privat gjatë sezonit 2024, nga një total prej 713,113 metra katrorë nën administrim të Bashkisë.
Kjo ndarje e hapësirave të plazheve, sipas bashkisë është bërë duke ruajtur një balancë mes interesave publike dhe private. Sipas këtij raporti, 70% e plazheve janë në përdorim privat, ndërsa 30% janë rezervuar për publikun.
Përfitimet ekonomike dhe vendimi për rritjen e taksave
Përfitimet ekonomike të administrimit të plazheve nuk janë të pakta. Falë rritjes së nivelit të taksave për hapësirat publike të plazheve, bazuar në Vendimin e Këshillit Bashkiak Nr. 96, datë 7 dhjetor 2023, të ardhurat nga qiratë e plazheve kanë njohur një rritje të ndjeshme. Deri në këtë periudhë të vitit, Bashkia ka grumbulluar 59,051,310 lekë nga të ardhurat e plazheve, një fond që planifikohet të përdoret për investime të nevojshme në infrastrukturën turistike dhe përmirësimin e shërbimeve publike në Vlorë.
Ky vendim për rritjen e taksave synon të kompensojë kostot e larta të mirëmbajtjes dhe zhvillimit të infrastrukturës turistike, duke e bërë qytetin më tërheqës për turistët e huaj dhe vendas. Gjithashtu, përmes këtyre të ardhurave, Bashkia synon të krijojë mundësi më të mira për investime në fusha që lidhen me turizmin dhe shërbimet publike.
Sfida dhe objektivat për sezonin e ardhshëm turistik
Megjithëse sezoni 2024 ka parë sukses në administrimin e hapësirave të plazheve, Bashkia Vlorë thotë se është në proces të përmirësimit të mëtejshëm të këtij menaxhimi për sezonin e ardhshëm. Objektivi për 2025 është të ruhet balanca mes plazheve publike dhe atyre private, duke siguruar që qytetarët të kenë akses të garantuar në plazhet publike dhe që standardet e shërbimit të mbeten të larta.
Për më tepër, Bashkia po shqyrton mundësinë e ndarjes së plazheve të reja për përdorim publik në përgjigje të kërkesës në rritje të qytetarëve dhe turistëve, ndërsa subjekteve private do t’u kërkohet të përmbushin standarde më të larta për përmirësimin e shërbimeve dhe të infrastrukturës në zonat që ata menaxhojnë.
Rregullorja e re kombëtare për plazhet, si do të funksionojë
Më 16 tetor 2024, Këshilli i Ministrave të Shqipërisë miratoi një rregullore të re për kushtet dhe kriteret e ushtrimit të veprimtarisë së stacioneve të plazhit, duke sjellë një qasje më të rreptë dhe të detajuar për menaxhimin e zonave bregdetare dhe të plazheve publike dhe private. Vendimi i ri synon të rrisë standardet e shërbimeve të ofruara për pushuesit, të rrisë sigurinë në plazhe dhe të mbrojë mjedisin, duke adresuar njëkohësisht sfidat në lidhje me përdorimin dhe administrimin e hapësirave të plazhit.
Rregullorja përcakton që plazhet në Shqipëri do të kategorizohen në disa tipologji bazuar në përbërjen dhe karakteristikat natyrore:
- Plazh i tipit A: Kryesisht me përbërje ranore dhe me gjerësi të konsiderueshme të brezit të plazhit (jo më pak se 60 metra nga bregu). Këto plazhe pritet të jenë më të përshtatshme për turizmin masiv.
- Plazh i tipit B: Me përbërje shkëmbore dhe zhavorri, me një gjerësi të kufizuar nën 60 metra. Ky tip plazhi është më i zakonshëm në zonat malore bregdetare.
- Plazh i tipit AB: Kombinim i tipareve të plazhit ranor dhe shkëmbor.
- Plazh i tipit C: Plazhe të virgjëra ku nuk lejohet asnjë aktivitet për stacionet e plazhit përveç mirëmbajtjes dhe pastrimit të mbeturinave. Këto zona do të mbeten të paprekura për të ruajtur natyrën e tyre të paprishur.
Kriteret për shfrytëzimin e stacioneve të plazhit
Rregullorja e re përcakton që subjektet që dëshirojnë të ushtrojnë aktivitetet e stacionit të plazhit duhet të plotësojnë kritere të caktuara:
- Regjistrimi dhe kategorizimi i strukturave: Subjektet duhet të jenë të regjistruara dhe të kenë struktura akomoduese të kategorizuara nga Ministria e Turizmit.
- Shërbimet minimale: Stacionet e plazhit duhet të përfshijnë kabina për veshje, dushe, tualete të ndara për gra, burra dhe persona me aftësi të kufizuara, dhe një zonë të ndihmës së shpejtë.
- Siguria në plazh: Vendosja e vrojtuesve të plazhit është e detyrueshme për çdo 80 metra vijë bregdetare. Stacionet gjithashtu duhet të kenë pika vrojtimi të pajisura me mjete shpëtimi dhe ndihmë të shpejtë.
- Distancat dhe hapësirat: Duhet të respektohen distanca të caktuara midis çadrave dhe nga vija e bregut për të garantuar sigurinë dhe hapësirën për lëvizje.
- Pajisjet për ndihmën e parë: Stacionet e plazhit duhet të kenë pajisje të plotësuara për ndihmën e parë dhe të mirëmbajnë të gjitha mjetet në dispozicion për të garantuar sigurinë e pushuesve.
Përdorimi publik dhe privat i plazheve
Sipas rregullores, hapësirat e plazheve të cilat nuk janë dhënë për përdorim privat do të jenë për përdorim publik dhe do të menaxhohen nga njësitë e vetëqeverisjes vendore. Për çdo 1,000 metra vijë lineare plazhi, 300 metra do të jenë të destinuara për plazhe publike, duke siguruar që të gjithë pushuesit të kenë akses të lirë në bregdet.
Mbikëqyrja dhe inspektimi
Strukturat përgjegjëse do të inspektojnë dhe monitorojnë respektimin e kushteve dhe kritereve të përcaktuara në këtë rregullore. Në rast të shkeljeve administrative, do të merren masa të menjëhershme për zgjidhjen e situatës, dhe subjektet që nuk përmbushin detyrimet mund të humbasin të drejtën për të operuar stacionin e plazhit.